ज्ञानेश्वरी अध्याय १८ वा ओव्या १४३५ ते १४५६ (सारांश )

ज्ञानेश्वरी / अध्याय अठरावा / संत ज्ञानेश्वर
ओव्या १४३५ ते १४५६ (सारांश )

तरी पहिला जो अध्यावो | तो शास्त्रप्रवृत्तिप्रस्तावो |
द्वितीयीं साङ्ख्यसद्भावो | प्रकाशिला ॥ १४३५ ॥

मोक्षदानीं स्वतंत्र | ज्ञानप्रधान हें शास्त्र |
येतुलालें दुजीं सूत्र | उभारिलें ॥ १४३६ ॥

मग अज्ञानें बांधलेयां | मोक्षपदीं बैसावया |
साधनारंभु तो तृतीया\- | ध्यायीं बोलिला ॥ १४३७ ॥

जे देहाभिमान बंधें | सांडूनि काम्यनिषिद्धें |
विहित परी अप्रमादें | अनुष्ठावें ॥ १४३८ ॥

ऐसेनि सद्भावें कर्म करावें | हा तिजा अध्यावो जो देवें |
निर्णय केला तें जाणावें | कर्मकांड येथ ॥ १४३९ ॥

आणि तेंचि नित्यादिक | अज्ञानाचें आवश्यक |
आचरतां मोंचक | केवीं होय पां ॥ १४४० ॥

मोंचक=मोक्ष दायी

ऐसी अपेक्षा जालिया | बद्ध मुमुक्षुते आलिया |
देवें ब्रह्मार्पणत्वें क्रिया | सांगितली ॥ १४४१ ॥

जे देहवाचामानसें | विहित निपजे जें जैसें |
तें एक ईश्वरोद्देशें | कीजे म्हणितलें ॥ १४४२ ॥

हेंचि ईश्वरीं कर्मयोगें | भजनकथनाचें खागें |
आदरिलें शेषभागें | चतुर्थाचेनी ॥ १४४३ ॥

खागें=प्रकारे

तें विश्वरूप अकरावा | अध्यावो संपे जंव आघवा |
तंव कर्में ईशु भजावा | हें जें बोलिलें ॥ १४४४ ॥

तें अष्टाध्यायीं उघड | जाण येथें देवताकांड |
शास्त्र सांगतसे आड | मोडूनि बोलें ॥ १४४५ ॥

आणि तेणेंचि ईशप्रसादें | श्रीगुरुसंप्रदायलब्धें |
साच ज्ञान उद्बोधे | कोंवळें जें ॥ १४४६ ॥

तें अद्वेष्टादि,प्रभृतिकीं | अथवा अमानित्वादिकीं |
वाढविजे म्हणौनि लेखी | बारावा गणूं ॥ १४४७ ॥

तो बारावा अध्याय आदी | आणि पंधरावा अवधी |
ज्ञानफळपाकसिद्धी | निरूपणासीं ॥ १४४८ ॥

म्हणौनि चहूंही इहीं | ऊर्ध्वमूळांतीं अध्यायीं |
ज्ञानकांड ये ठायीं | निरूपिजे ॥ १४४९ ॥

ऊर्ध्वमूळांतीं अध्यायीं=१५ वा

एवं कांडत्रयनिरूपणी | श्रुतीचि हे कोडिसवाणी |
गीतापद्यरत्नांचीं लेणीं | लेयिली आहे ॥ १४५० ॥

कोडिसवाणी=सुंदर

हें असो कांडत्रयात्मक | श्रुति मोक्षरूप फळ येक |
बोभावे जें आवश्यक | ठाकावें म्हणौनि ॥ १४५१ ॥

बोभावे=गरजून सांगणे

तयाचेनि साधन ज्ञानेंसीं | वैर करी जो प्रतिदिवशीं |
तो अज्ञानवर्ग षोडशीं | प्रतिपादिजे ॥ १४५२ ॥

तोचि शास्त्राचा बोळावा | घेवोनि वैरी जिणावा |
हा निरोपु तो सतरावा | अध्याय येथ ॥ १४५३ ॥

बोळावा=रक्षक

ऐसा प्रथमालागोनि | सतरावा लाणी करूनी |
आत्मनिश्वास विवरूनी | दाविला देवें ॥ १४५४ ॥

तया अर्थजातां अशेषां | केला तात्पर्याचा आवांका |
तो हा अठरावा देखा | कलशाध्यायो ॥ १४५५ ॥

आवांका=साकल्य पूर्ण

एवं सकळसंख्यासिद्धु | श्रीभागवद्गीता प्रबंधु |
हा औदार्यें आगळा वेदु | मूर्तु जाण ॥ १४५६ ॥

http://dnyaneshwariabhyas.blogspot.in/

by dr. vikrant tikone