ज्ञानेश्वरी .अध्याय ३ / ओव्या ५३ ते १०० / संत ज्ञानेश्वर

ज्ञानेश्वरी .अध्याय ३ / ओव्या ५३ ते १०० /  संत ज्ञानेश्वर

 न हि कश्चित् क्षणमपि जातु तिष्ठत्यकर्मकृत्।
     कार्यते ह्यवशः कर्म सर्वः प्रकृतिजैगुणैः ॥ ५ ॥

जंव प्रकृतीचें अधिष्ठान, तंव सांडी मांडी हें अज्ञान।
जि चेष्टा गुणाधीन, आपैसी असे ॥ ५३ ॥

देखें विहित कर्म जेतुलें, तें सळें जरी वोसंडिलें।
तरी स्वभाव काय निमाले, इंद्रियांचे ॥ ५४ ॥

सळें=हट्टाने

सांगे श्रवणीं ऐकावें ठेलें, की नेत्रीचे तेज गेलें।
हें नासारंध्र बुझालें, परिमळु नेघे ॥ ५५ ॥

ना तरी प्राणापानगति, की निर्विकल्प जाहली मति।
की क्षुधातृषादि आर्ति, खुंटलिया ॥ ५६ ॥

हे स्वप्नावबोधु ठेले, कीं चरण चालो विसरले।
हे असो काय निमाले, जन्ममृत्यू ॥ ५७ ॥

हें न ठकेचि जरी कांही, तरी सांडिले तें कायी।
म्हणोनि कर्मत्यागु नाही, प्रकृतिमंतां ॥ ५८ ॥

कर्म पराधीनपणे, निपजतसे प्रकृतिगुणें।
येरीं धरीं मोकलीं अंतःकरणें, वाहिजे वायां ॥ ५९ ॥

मोकलीं=सोडणे 

देखें रथीं आरूढिजे, मग निश्चळा बैसिजे।
मग चळा होऊनि हिंडिजे, परतंत्रा ॥ ६० ॥

चळा=चल 

कां उचलिलें वायुवशें, चळें शुष्क पत्र जैसें।
निचेष्ट आकाशे, परिभ्रमे ॥ ६१ ॥

तैसें प्रकृतिआधारें, कर्मेंद्रियविकारें।
निष्कर्म्युही व्यापारे, निरंतर ॥ ६२ ॥

म्हणऊनि संगु जंव प्रकृतिचा, तंव त्यागु न घडे कर्माचा।
ऐसियाहि करूं म्हणती तयांचा, आग्रहोचि उरें ॥ ६३ ॥

     कर्मेंद्रियाणि संयम्य य आस्ते मनसा स्मरन्।
     इंद्रियार्थान् विमूढात्मा मिथ्याचारः स उचयते ॥ ६ ॥

जे उचित कर्म सांडिती, मग नैष्कर्म्य होऊं पाहती।
परी कर्मेंद्रियप्रवृत्ती, निरोधूनि ॥ ६४ ॥

नैष्कर्म्य=कर्मातीत अवस्था

तयां कर्मत्यागु न घडे, जें कर्तव्य मनीं सापडे।
वरी नटती तें फुडे, दरिद्र जाण ॥ ६५ ॥

वरी =वरवर. नटती-=सजणे . फुडे=फोल

ऐसे ते पार्था, विषयासक्त सर्वथा।
वोळखावे तत्वता, येथ भ्रांति नाहीं ॥ ६६ ॥

आतां देई अवधान, प्रसंगे तुज सांगेन।
या नैराश्याचे चिन्ह, धनुर्धरा ॥ ६७ ॥

नैराश्याचे=विरक्त

     यस्तित्वंद्रियाणि मनसा नियम्यारभतेऽर्जुन।
     कर्मेन्द्रियैः कर्मयोगमसक्तः न विशिष्यते ॥ ७ ॥

जो अंतरी दृढ, परमात्मरूपीं गूढ।
बाह्य तरी रूढ, लौकिक जैसा ॥ ६८ ॥

तो इंद्रियां आज्ञा न करी, विषयांचे भय न धरी।
प्राप्त कर्म न अव्हेरी, उचित जें जें ॥ ६९ ॥

तो कर्मेंद्रियें कर्मी, राहाटतां तरी न नियमी।
परी तेथिचेनि उर्मी, झांकोळेना ॥ ७० ॥

राहाटतां =वागता वावरता  ,झांकोळेना=व्यापणे

तो कामनामात्रें न घेपे, मोहमळें न लिंपे।
जैसे जळीं जळें न शिंपें, पद्मपत्र ॥ ७१ ॥

तैसा संसर्गामाजि असे, सकळांसारिखा दिसे।
जैसें तोयसंगे आभासे, भानुबिंब ॥ ७२ ॥

तैसा सामन्यत्वें पाहिजे, तरी साधारणुचि देखिजे।
येरवीं निर्धारितां नेणिजे, सोय जयाची ॥ ७३ ॥

निर्धारितां= नीट पाहता 

ऐसां चिन्हीं चिन्हितु, देखसी तोचि तरी मुक्तु।
आशापाशरहितु, वोळख पां ॥ ७४ ॥

अर्जुना तोचि योगी, विशेषिजे जो जगीं।
म्हणोनि ऐसा होय यालागीं, म्हणिपे तूंते ॥ ७५ ॥

तूं मानसा नियमु करीं, निश्चळु होय अंतरी।
मग कर्मेंद्रियें हीं व्यापारीं, वर्ततु सुखें ॥ ७६ ॥

     नियतं कुरु कर्म त्वं ज्यायो ह्यकर्मणः।
     शरीरयात्रापि च ते न प्रसिध्येदकर्मणः ॥ ८ ॥

म्हणशी नैष्कर्म्य होआवें, तरी एथ तें न संभवे।
आणि निषिद्ध केवीं राहाटावें, विचारी पां ॥ ७७ ॥

निषिद्ध=शास्त्रबाह्य 

म्हणोनि जें जें उचित, आणि अवसरेंकरून प्राप्त।
तें कर्म हेतुरहित, आचर तूं ॥ ७८ ॥

पार्था आणिकही एक, नेणसी तूं हे कवतिक।
जें ऐसें कर्म मोचक, आपैसें असे ॥ ७९ ॥

मोचक=मुक्तिदायक

देखें अनुक्रमाधारें, स्वधर्मु जो आचरे।
तो मोक्षु तेणें व्यापारें, निश्चित पावे ॥ ८० ॥

अनुक्रमाधारें=क्रमपात्र

     यज्ञार्थात् कर्मणोऽन्यत्र लोकोऽयं कर्मबंधनः।
     तदर्थे कर्म कौंतेय मुक्तसङगः समाचरः ॥ ९ ॥

स्वधर्मु जो बापा, तोचि नित्ययज्ञु जाण पां।
म्हणोनि वर्ततां तेथ पापा, संचारु नाहीं ॥ ८१ ॥

हा निजधर्मु जैं सांडे, कुकर्मी रति घडे।
तैंचि बंधु पडे, संसारिकु ॥ ८२ ॥

म्हणोनि स्वधर्मानुष्ठान, ते अखंड यज्ञयाजन।
जो करी तया बंधन, कहींच नाहीं ॥ ८३ ॥

हा लोकु कर्में बांधिला, जो परतंत्रा भुतला।
तो नित्ययज्ञाते चुकला, म्हणोनियां ॥ ८४ ॥

परतंत्रा=पराधीन

आतां येचिविशीं पार्था, तुज सांगेन एकी मी कथा।
जैं सृष्ट्यादि संस्था, ब्रह्मेनि केली ॥ ८५ ॥

     सहयज्ञाः प्रजाः सृष्ट्वा पुरोवाच प्रजापतिः।
     अनेन प्रसविष्यध्वमेष वोऽस्त्विष्टकामधुक् ॥ १० ॥

तें नित्ययागसहितें, सृजिलीं भूतें समस्तें।
परी नेणतीचि तिये यज्ञातें, सूक्ष्म म्हणऊनी ॥ ८६ ॥

तें वेळीं प्रजीं विनविला ब्रह्मा, देवा आश्रयो काय एथ आम्हां।
तंव म्हणे तो कमळजन्मा, भूतांप्रति ॥ ८७ ॥

तुम्हां वर्णविशेषवशें, आम्हीं हा स्वधर्मुचि विहिला असे।
यातें उपासा मग आपैसे, काम पुरती ॥ ८८ ॥

वर्णविशेषवशें=स्वधर्मानुसार    विहिला=दिला (वाटला)

तुम्हीं व्रतें नियमु न करावे, शरीरातें न पीडावें।
दुरी केंही न वचावे, तीर्थासी गा ॥ ८९ ॥

योगादिक साधनें, साकांक्ष आराधनें।
मंत्रयंत्रविधानें, झणीं करा ॥ ९० ॥

झणीं=नको

देवतांतरा न भजावें, हें सर्वथा कांहीं न करावे।
तुम्हीं स्वधर्मयज्ञीं यजावें, अनायासें ॥ ९१ ॥

अहेतुकें चित्तें, अनुष्ठां पां ययातें।
पतिव्रता पतीतें, जियापरी ॥ ९२ ॥

तैसा स्वधर्मरूप मखु, हाचि सेव्य तुम्हां एकु।
ऐसें सत्यलोकनायकु, म्हणता जहाला ॥ ९३ ॥

मखु=यज्ञ 

देखा स्वधर्मातें भजाल, तरी कामधेनु हा होईल।
मग प्रजाहो न संडील, तुमतें सदा ॥ ९४ ॥

संडील=सोडील

     देवान् भावयतानेन ते देवाः भावयंतु वः।
     परस्परं भावयंतः श्रेयः परमवाप्स्यच ॥ ११ ॥

जें येणेचिकरूनि समस्तां, परितोषु होईल देवतां।
मग ते तुम्हां ईप्सीता, अर्थांते देती ॥ ९५ ॥

ईप्सीता=हवे ते परितोषु=संतोषुन

या स्वधर्मपूजा पूजितां, देवतागणां समस्तां।
योगक्षेमु निश्चिता, करिती तुमचा ॥ ९६ ॥

तुम्हीं देवतांते भजाल, देव तुम्हां तुष्टितील।
ऐसी परस्परें घडेल, प्रीति तेथ ॥ ९७ ॥

तेथ तुम्हीं जें करूं म्हणाल, ते आपैसे सिद्धी जाईल।
वांछितही पुरेल, मानसींचे ॥ ९८॥

वाचासिद्धी पावाल, आज्ञापक होआल।
म्हणिये तुमतें मागतील, महाऋद्धि ॥ ९९ ॥

आज्ञापक=आज्ञा देणारे

जैसें ऋतुपतींचे द्वार, वनश्री निरंतर।
वोळगे फळभार, लावण्येंसी ॥ १००॥

ऋतुपतींचे=वसंत ऋतू

==========================================