ज्ञानेश्वरी अध्याय ७ वा ज्ञान विज्ञान योग ओव्या १ ते ६७

ज्ञानेश्वरी / अध्याय सातवा/ ज्ञान विज्ञान योग / ओव्या १ ते ६७ 

संत ज्ञानेश्वर महाराज

श्रीभगवानुवाच।

मय्यासक्तमनाः पार्थ योगं युञ्जन्मदाश्रयः।
असंशयं समग्रं मां यथा ज्ञास्यसि तच्छृणु ॥ १ ॥

ज्ञानं तेऽहं सविज्ञानमिदं वक्ष्याम्यशेषतः।
यज्ञात्वा नेह भूयोऽन्यज्ञातव्यमवशिष्यते ॥ २ ॥



आइका मग तो श्रीअनंतु। पार्थातें असे म्हणतु।

पैं गा तूं योगयुक्तु। जालासि आतां ॥ १ ॥

मज समग्रातें जाणसी ऐसें। आपुलिया तळहातींचें रत्न जैसें।

तुज ज्ञान सांगेन तैसें। विज्ञानेंसीं ॥ २ ॥

ज्ञान=आत्मज्ञान   विज्ञान =प्रपंच

एथ विज्ञानें काय करावें। ऐसें घेसी जरी मनोभावें।

तरी पैं आधीं जाणावें। तेंचि लागे ॥ ३ ॥

मग ज्ञानाचिये वेळे। झांकती जाणिवेचे डोळे।

जैसी तीरीं नाव न ढळे। टेकलीसांती ॥ ४ ॥

जाणीवेचे डोळे =प्रापंचिक ज्ञानाची जाणीव

तैसी जाणीव जेथ न रिघे। विचार मागुता पाउलीं निघे।

तर्कु आयणी नेघे। आंगीं जयांच्या ॥ ५ ॥

तर्कु आयणी= तर्काचे चातुर्य

अर्जुना तया नांव ज्ञान। येर प्रपंचु हें विज्ञान।

तेथ सत्यबुद्धि तें अज्ञान। हेंही जाण ॥ ६ ॥

अज्ञान= विज्ञान (प्रपंच) सत्य मानने हे 

आतां अज्ञान अवघें हरपे। विज्ञान निःशेष करपे।

आणि ज्ञान तें स्वरूपें। होऊनि जाइजे ॥ ७ ॥

जेणें सांगतयाचें बोलणें खुंटे। ऐकतयाचें व्यसन तुटे।

हें जाणणें सानें मोठें। उरों नेदी ॥ ८ ॥

व्यसन=आसक्ती आस   सानें=लहान

ऐसें वर्म जें गूढ। तें किजेल वाक्यारूढ।

जेणें थोडेन पुरे कोड। बहुत मनींचें ॥ ९ ॥

कोड=आवड इच्छा

मनुष्याणां सहस्त्रेषु कश्चिद्यतति सिद्धये।
यततामपि सिद्धानां कश्चिन्मां वेत्ति तत्त्वतः ॥ ३ ॥



पैं गा मनुष्यांचिया सहस्त्रशां-, माजीं विपाइले याचि धिंवसा।

तैसें या धिंवसेकरां बहुवसां। माजीं विरळा जाणे ॥ १० ॥

विपाइले = क्वचित मिळणे  धिंवसा=इच्छा बहुवसां=पुष्कळ

जैसा भरलेया त्रिभुवना-, आंतु एकएकु चांगु अर्जुना।

निवडूनि कीजे सेना। लक्षवरी ॥ ११ ॥

चांगु=शूर

कीं तयाही पाठीं। जे वेळीं लोह मांसातें घांटी।

ते वेळीं विजयश्रियेच्या पाटीं। एकुची बैसे ॥ १२ ॥

लोह मांसातें घांटी=शस्त्र देहात घुसुनी तेव्हा ,युद्धात

तैसें आस्थेच्या महापुरीं। रिघताती कोटिवरी।

परी प्राप्तीच्या पैलतीरीं। विपाइला निगे ॥ १३ ॥

विपाइला=दैव योगाने चुकून क्वचित

म्हणौनि सामान्य गा नोहे। हें सांगतां वडिल गोठी आहे।

परी तें बोलों येईल पाहें। आता प्रस्तुत ऐकें ॥ १४ ॥

वडिल=फार मोठी थोर प्रस्तुत=सध्याचे (ज्ञान विज्ञान )

भूमिरापोऽनलो वायुः खं मनो बुद्धिरेव च।
अहंकार इतीयं मे भिन्ना प्रकृतिरष्टधा ॥ ४ ॥



तरी अवधारीं गा धनंजया। हे महदादिक माझी माया।

जैसी प्रतिबिंबे छाया। निजांगाची ॥ १५ ॥

आणि इयेतें प्रकृति म्हणिजे। जे अष्टधा भिन्न जाणिजे।

लोकत्रय निपजे। इयेस्तव ॥ १६ ॥

हे अष्टधा भिन्न कैसी। ऐसा ध्वनि धरिसी जरी मानसीं।

तरी तेचि गा आतां परियेसीं। विवंचना ॥ १७ ॥

आप तेज गगन। मही मारुत मन।

बुद्धि अहंकारु हे भिन्न। आठै भाग ॥ १८ ॥

मही=पृथ्वी  मारुत=वायू

अपरेयमितस्त्वन्यां प्रकृतिं विद्धि मे पराम्।
जीवभूतां महाबाहो ययेदं धार्यते जगत् ॥ ५ ॥

खाली परा प्रकृती विवेचन आहे

या आठांची जे साम्यावस्था। ते माझी परम प्रकृति पार्था।

तिये नाम व्यवस्था। जीवु ऐसी ॥ १९ ॥

व्यवस्था =परा प्रकृती (जी जीवस्वरूप आहे )

जे जडातें जीववी। चेतनेतें चेतवी।

मना करवीं मानवी। शोक मोहो ॥ २० ॥

पैं बुद्धीच्या अंगीं जाणणें। तें जिये जवळिकेचें करणें।

जिया अहंकाराचेनि विंदाणें। जगचि धरिजे ॥ २१ ॥

जवळिकेचें=सहवास  विंदाणें=कौशल्य

एतद्योनीनि भूतानि सर्वाणीत्युपधारय।
अहं कृत्स्नस्य जगतः प्रभवः प्रलयस्तथा ॥ ६ ॥



ते सूक्ष्म प्रकृति कोडें। जैं स्थूळाचिया आंगा घडे।

तैं भूतसृष्टीची पडे। टांकसाळ ॥ २२ ॥

कोडें=कौतुके

चतुर्विध ठसा। उमटों लागे आपैसा।

मोला तरी सरसा। परी थरचि आनान ॥ २३ ॥

चतुर्विध=चार प्रकारची जारज अंडज स्वेदज उद्भिज

होती चौऱ्यांशीं लक्ष थरा। येरा मिती नेणिजे भांडारा।

भरे आदिशून्याचा गाभारा। नाणेयांसी ॥ २४ ॥

मिती=मोजणी

ऐसें एकतुके पांचभौतिक। पडती बहुवस टांक।

मग तिये समृद्धीचे लेख। प्रकृतीचि धरी ॥ २५ ॥

एकतुके=एक सारखी टांक=नाणी लेख=मोजदाद  

जे आखूनि नाणें विस्तारी। पाठी तयाची आटणी करी।

माजीं कर्माकर्माचिया व्यवहारीं। आखूनि प्रवर्तु दावी ॥ २६ ॥

आखूनि=योजून   प्रवर्तु = उद्योग लावी प्रवृत्त करणे  

हें रूपक परी असो। सांगों उघड जैसें परियेसों।

तरी नामरूपाचा अतिसो। प्रकृतीच कीजे ॥ २७ ॥

अतिसो=विस्तार

आणि प्रकृति तंव माझ्या ठायीं। बिंबे येथें आन नाहीं।

म्हणौनि आदि मध्य अवसान पाहीं। जगासि मी ॥ २८ ॥

अवसान=अंत

मत्तः परतरं नान्यत्किंचिदस्ति धनंजय।
मयि सर्वमिदं प्रोतं सूत्रे मणिगणा इव ॥ ७ ॥



हें रोहिणीचें जळ। तयाचें पाहतां येइजे मूळ।

तैं रश्मि नव्हती केवळ। होय तें भानु ॥ २९ ॥

तयाचिपरी किरीटी। इया प्रकृती जालिये सृष्टी।

जैं उपसंहरूनि कीजेल ठी। तैं मीचि आहें ॥ ३० ॥

ठी=मुक्काम वस्ती

ऐसें होय दिसे न दिसे। हें मजचि माजीं असे।

मियां विश्व धरिजे जैसें। सूत्रें मणि ॥ ३१ ॥

सुवर्णाचे मणी केले। ते सोनियाचे सुतीं वोविले।

तैसें म्यां जग धरिलें। सबाह्याभ्यंतरीं ॥ ३२ ॥



रसोऽहमप्सु कौन्तेय प्रभास्मि शशिसूर्ययोः।
प्रणवः सर्ववेदेषु शब्दः खे पौरुषं नृषु ॥ ८ ॥



पुण्यो गन्धः पृथिव्यां च तेजश्चास्मि विभावसौ।
जीवनं सर्वभूतेषु तपश्चास्मि तपस्विषु ॥ ९ ॥



म्हणौनि उदकीं रसु। कां पवनीं जो स्पर्शु।

शशिसूर्यीं जो प्रकाशु। तो मीचि जाण ॥ ३३ ॥

तैसाचि नैसर्गिकु शुद्धु। मी पृथ्वीच्या ठायीं गंधु।

गगनीं मी शब्दु। वेदीं प्रणवु ॥ ३४ ॥

नराच्या ठायीं नरत्व। जें अहंभाविये सत्त्व।

तें पौरुष मी हें तत्त्व। बोलिजत असे ॥ ३५ ॥

अग्नि ऐसें आहाच। तेज नामाचें आहे कवच।

तें परतें केलिया साच। निजतेज तें मी ॥ ३६ ॥

आहाच=वरवरचे

आणि नानाविध योनी। जन्मोनि भूतें त्रिभुवनीं।

वर्तत आहाति जीवनीं। आपुलाल्या ॥ ३७ ॥

एकें पवनेंचि पिती। एकें तृणास्तव जिती।

एकें अन्नाधारें राहती। जळें एकें ॥ ३८ ॥

ऐसें भूतांप्रति आनान। जें प्रकृतिवशें दिसे जीवन।

तें आघवाठायीं अभिन्न। मीचि एक ॥ ३९ ॥



बीजं मां सर्वभूतानां विद्धि पार्थ सनातनम्।
बुद्धिर्बुद्धिमतामस्मि तेजस्तेजस्विनामहम् ॥ १० ॥



बलं बलवतां चाहं कामरागविवर्जितम्।
धर्माविरुद्धो भूतेषु कामोऽस्मि भरतर्षभ ॥ ११ ॥



पैं आदिचेनि अवसरें। विरूढे गगनाचेनि अंकुरें।

जे अंतीं गिळी अक्षरें। प्रणवपीठींचीं ॥ ४० ॥

आदिचेनि अवसरें-=उत्पत्तीच्या वेळी

विरूढे=रुजणे

जंव हा विश्वाकारु असे। तंव जें विश्वाचिसारिखें दिसे।

मग महाप्रळयदशे। कैसेंही नव्हे ॥ ४१ ॥

ऐसें अनादि जें सहज। तें मी गा विश्वबीज।

हें हातातळीं तुज। देइजत असे ॥ ४२ ॥

मग उघड करूनि पांडवा। जैं हे आणिसील सांख्याचिया गांवा।

तैं ययाचा उपेगु बरवा। देखशील ॥ ४३ ॥

सांख्याचिया गांवा= ज्ञान बुद्धीत घेशील (समजून घेवून)

परी हे अप्रासंगिक आलाप। आतां असतु न बोलों संक्षेप।

जाण तपियांच्या ठायीं तप। तें रूप माझें ॥ ४४ ॥

आलाप =बोलणे संक्षेप=थोडक्यात

बळियांमाजीं बळ। तें मी जाणें अढळ।

बुद्धिमंतीं केवळ। बुद्धि तें मी ॥ ४५ ॥

भूतांच्या ठायीं कामु। तो मी म्हणे आत्मारामु।

जेणें अर्थास्तव धर्मु। थोरु होय ॥ ४६ ॥

जेणें अर्थास्तव=ज्या मुळे

एऱ्हवीं विकाराचेनि पैसे। करी कीर इंद्रियांचि ऐसें।

परी धर्मासि वेखासें। जावों नेदी ॥ ४७ ॥

पैसे=विस्तार(मार्ग )   वेखासें=विरुध्द

जो अप्रवृत्तीचा अव्हांटा। सांडूनि विधीचिया निघे वाटा।

तेवींचि नियमाचा दिवटा। सवें चाले ॥ ४८ ॥

अव्हांटा=आडवाटा   दिवटा=दिवटी मशाल

कामु ऐसिया वोजा प्रवर्ते। म्हणौनि धर्मासि होय पुरतें।

मोक्षतीर्थींचे मुक्तें। संसार भोगी ॥ ४९ ॥

वोजा=रीत पुरतें=पूर्ण होणे   मुक्तें=मोती (जीवन मुक्त )

जो श्रुतिगौरवाच्या मांडवीं। काम सृष्टीचा वेलु वाढवी।

जंव कर्मफळेंसि पालवी। अपवर्गीं टेंके ॥ ५० ॥

अपवर्गीं=मोक्ष

ऐसा नियुत कां कंदर्पु। जो भूतां या बीजरूपु।

तो मी म्हणे बापु। योगियांचा ॥ ५१ ॥

कंदर्पु=काम

हें एकेक किती सांगावें। आतां वस्तुजातचि आघवें।

मजपासूनि जाणावें। विकारलें असे ॥ ५२ ॥

विकारलें=आकारा आले

ये चैव सात्त्विका भावा राजसास्तामसाश्च ये।
मत्त एवेति तान्विद्धि न त्वहं तेषु ते मयि ॥ १२ ॥



जे सात्त्विक हन भाव। कां रजतमादि सर्व।

तें ममरूपसंभव। वोळखें तूं ॥ ५३ ॥

हे जाले तरी माझ्या ठायीं। परी तयामाजीं मी नाहीं।

जैसी स्वप्नींच्या डोहीं। जागृति न बुडे ॥ ५४ ॥

जैसी रसाचीच सुघट। बीजकणिका घनवट।

परी तियेस्तव होय काष्ठ। अंकुरद्वारें ॥ ५५ ॥

मग तया काष्ठाच्या ठायीं। सांग पां बीजपण असे काई ?,

तैसा मी विकारीं नाहीं। जरी विकारला दिसे ॥ ५६ ॥

पैं गगनीं उपजे आभाळ। परी तेथ गगन नाहीं केवळ।

अथवा आभाळीं होय सलिल। तेथ अभ्र नाहीं ॥ ५७ ॥

आभाळ=ढग    अभ्र=ढग

मग त्या उदकाचेनि आवेशें। प्रगटलें तेज जें लखलखीत दिसे।

तिये विजूमाजीं असे। सलिल कायी ? ॥ ५८ ॥

सांगें अग्नीस्तव धूम होये। तिये धूमीं काय अग्नि आहे ?,

तैसा विकारु हा मी नोहें। जरी विकारला असे ॥ ५९ ॥



त्रिभिर्गुणमयैर्भावैरेभिः सर्वमिदं जगत्।
मोहितं नाभिजानाति मामेभ्यः परमव्ययम् ॥ १३ ॥



परी उदकीं जाली बाबुळी। ते उदकातें जैसी झांकोळी।

कां वायांचि आभाळीं। आकाश लोपे ॥ ६० ॥

बाबुळी=शेवाळ

हां गा स्वप्न लटिकें म्हणों ये। परि निद्रावशें बाणलें होये।

तंव आठवु काय देत आहे। आपणपेयां ? ॥ ६१ ॥

बाणलें=घेरले

हें असो डोळ्यांचें। डोळांचि पडळ रचे।

तेणें देखणेंपण डोळ्यांचे। न गिळजे कायी ? ॥ ६२ ॥

पडळ=पडदा

तैसी हे माझीच बिंबली। त्रिगुणात्मक साउली।

कीं मजचि आड वोडवली। जवनिका जैसी ॥ ६३ ॥

जवनिका=पडदा

म्हणौनि भूतें मातें नेणती। माझींच परी मी नव्हती।

जैसी जळींचि जळीं न विरती। मुक्ताफळें ॥ ६४ ॥

मुक्ताफळें=मोती

पैं पृथ्वीयेचा घटु कीजे। सवेंचि पृथ्वीसि मिळे तरी मेळविजे।

एऱ्हवीं तोचि अग्निसंगें सिजे। तरी वेगळा होय ॥ ६५ ॥

तैसें भूतजात सर्व। हे माझेचि कीर अवयव।

परि मायायोगें जीव-, दशे आले ॥ ६६ ॥

म्हणौनि माझेचि मी नव्हती। माझेचि मज नोळखती।

अहंममताभ्रांती। विषयांध जाले ॥ ६७ ॥

=========================================================================